काठमाडौं : रोलर मिल एशोसिएसन अफ इन्डियाले २०२५ मार्च ३ र ४ मा गोवामा आयोजना गरेको ू”The Future of Milling Vision 2030 & Beyond” सेमिनारको निमन्त्रणामा नेपाल मैदा उद्योग संघले प्रतिनिधिमूलक सहभागिता जनाएको छ । रोलर मिल एशोसिएसन अफ इन्डियाले यस प्रकारको कार्यक्रम प्रत्येक ५ वर्षमा एक पटक आयोजना गर्ने गरेको छ ।
यस कार्यक्रममा भारतका ६०० भन्दा धेरै मैदा आँटा मिल कम्पनीहरू तथा अन्य वैदेशिक राष्ट्रका मिलिङ कम्पनीहरू र खाद्यान्न उत्पादन, खाद्य सुरक्षा, खाद्य व्यवस्थापन एवं खाद्य प्रशोधन प्रविधिसँग सम्बन्धित कम्पनी र विशेषज्ञहरूको उत्साहजनक सहभागिता थियो ।
सो कार्यक्रममा नेपाल फ्लोर मिल्स एसोसिएसनका अध्यक्ष श्री कुमुद दुगडको नेतृत्वमा नेपालका प्रतिष्ठित १६ मैदा मिल कम्पनीहरूले सहभागिता जनाएका थिए । ३ दिने कार्यक्रममा मैदा मिलको भविष्य, गहुँको उत्पादन, खाद्य सुरक्षा, नयाँ प्रविधि र विभिन्न चुनौती लगायतका विषयमा विस्तारमा छलफल तथा अन्तरक्रिया गरिएको थियो । गहुँ लगायत अन्य विभिन्न बालीको निरीक्षण एवं उत्पादन वृद्धि गर्नको लागि स्याटलाइटबाट वास्तविक उत्पादनको क्षेत्रफल र अवस्था निरीक्षण गर्ने, उत्पादनको भविष्यवाणी गर्ने गरेको कुरा विभिन्न विशेषज्ञहरूले प्रस्ट पारे ।
जसले गर्दा वास्तविक कृषि उत्पादन वृद्धि गर्नको लागि योजनाबद्ध तरिकाले काम गर्न र उत्पादन बढाउन सहयोग भएको पाइयो । त्यस्तै लामो समयका लागि खाद्य भण्डारण गर्दा अपनाउनुपर्ने कुराहरू र त्यसै क्रममा उपयोग हुने प्रविधिहरूका विषयमा विभिन्न कम्पनीका प्रतिनिधि र खाद्य भण्डारण विशेषज्ञहरूले प्रस्ट पारे । गहुँको बजारीकरण, भण्डारण, निरीक्षण र प्रशोधन सम्बन्धी प्राविधिक कम्पनीहरूको मेसिन तथा इक्वीपमेन्ट प्रदर्शनीमार्फत नयाँ प्रविधिको बारेमा विस्तारमा जानकारी प्राप्त भयो ।
उक्त कार्यक्रममा नेपाल र भारतका मैदा मिल कम्पनीहरूका बीचमा परस्पर प्रविधि आदानप्रदान, प्राविधिक ट्रेनिङ कार्यक्रम मार्फत प्राविधिक जनशक्ति उत्पादन, खाद्य सुरक्षा लगायतका विषयमा मिलेर अगाडि बढ्ने सहमति भएको छ । कार्यक्रममा सहभागी नेपालका प्रतिनिधिहरूले कार्यक्रम निकै उत्साहजनक र ज्ञान वद्र्घक रहेको बताएका छन् । कार्यक्रमबाट प्राप्त ज्ञानले नेपालमा गहुँको उत्पादन, भण्डारण, निरीक्षण, प्रशोधन, गहुँजन्य गुणस्तरीय वस्तुको उत्पादन र बजारीकरणमा ठूलो भूमिका निर्वाह गर्ने कुरा सहभागीहरूले औँल्याएका छन् । हाल नेपालमा एक तिहाइ जनसंख्या बाहिर रहेको र मुख्य आहारको रूपमा चामलको खपत धेरै छ । यसलाई आधार मान्दा गहुँको औद्योगिक र घरेलु खपत जम्मा १२ लाख टन आँकलन गरिएको छ । जसमध्ये नेपालमा ४ लाख टन गहुँको अभाव देखिन्छ जुन भारत लगायत अन्य मुलुकबाट परिपूर्ति गर्नुपर्ने अवस्था छ ।
नेपालले मुख्यतया गहुँको आयात भारतबाट गर्दै आएको भएता पनि भारतले विगत निरन्तर ४ वर्षदेखि गहुँको नेपाल निर्यातमा प्रतिबन्ध लगाएको छ । यस वर्ष भारत सरकारले नेपाल सरकारलाई नेशनल कोअपरेटिव एक्सपोर्ट लिमिटेड मार्फत २ लाख टन गहुँ निर्यात गर्ने निर्णय गरेको छ । यसै बिचमा डेलिगेशनले दिल्लीमा रहेको भारत सरकार भारतीय कम्पनी (National Coorperative Experts Limited – NCEL) का प्रबन्ध निर्देशक श्री अनुपम कौशिक लगायतका टिमसँग ५ मार्चमा भेट गरी सहज तरिकाले गहुँ आयात गर्ने सम्बन्धमा विस्तृत छलफल गरेको थियो ।
विगतमा चामल, चिनी लगायत अन्य आयातमा कठिनाइ देखिएको थियो । यस अत्यन्त जरुरी बैठकले अब हुने गहुँ आयातका क्रममा त्यस प्रकारका विभिन्न विषयमा नेपाल फ्लोर मिल एशोसिएसन र नेशनल कोअपरेटिव एक्सपोर्ट लिमिटेडका बीचमा गहन छलफल गरी समस्या र कठिनाइहरुको निवारण गर्दै दुवै पक्षलाई सहज र विश्वासको वातावरण बनाएर काम गर्ने सहमति भएको छ ।
फेडरेशन अफ रोलर्स फ्लोर मिल इण्डियाद्वारा आयोजित द फ्यूचर अफ मिलिङ, भिजन २०३० एण्ड वियोण्ड विषयक सम्मेलनमा नेपालको तर्फबाट प्रतिनिधित्व गने यस संघका अध्यक्ष श्री कुमुद दुगडलाई सम्मान गरिएको थियो । भारतीय लोकसभाका सांसद प्रबिण खण्डेलवाल सहित फेडरेसन अफ रोलर्स फ्लोर मिल इण्डियाका केन्द्रीय अध्यक्ष लगायत उच्च पदस्थ व्यक्तित्व समेतको उपस्थितिमा उनलाई सम्मान गरिएको हो ।
नेपाल फ्लोर मिल एशोसिएसनका अध्यक्ष श्री कुमुद दुगडले नेपालमा गहुँको उत्पादन वृद्धि गर्न, गहुँको भण्डारण व्यवस्थित गर्न, खाद्य सुरक्षा कायम राख्दै गहुँजन्य आँटा, मैदा, सुजी, चोकर लगायतका वस्तुहरूको गुणस्तरीय उत्पादन गर्न सधैँ सरकारका विभिन्न निकाय र सरोकारवाला निकायहरूसँग सहकार्य गरी अगाडि बढ्न नेपाल फ्लोर मिल एशोसिएसन सदैव तत्पर रहेको सन्देश समेत दिए ।
भारत सरकारले फ्लोर मिलमा कार्यरत प्राविधिकलाई नयाँ प्रविधिमूलक उत्पादनका लागि लखनउमा प्राविधिक तालिम केन्द्र सञ्चालनमा ल्याइने, भारत सरकारले गहुँ बोर्ड गठन गर्ने, तथा नेपालका उद्योगी व्यवसायी र प्राविधिकलाई नयाँ प्रविधिको जानकारी गराउन नियमित रूपमा तालिमको अवसर प्रदान गरिने घोषणा समेत सम्मेलनमा भएको थियो ।