काठमाडौँ, २५ मंसिर
सहिद स्मारक ए डिभिजन लिगको चौथो चरणको खेलमा मछिन्द्रले हिमालयन शेर्पालाई ३-० ले हराएको छ ।
शनिबार त्रिपुरेश्वरस्थित दशरथ रंगशालामा भएको खेलमा सुनील बल, नुर्लान नोभ्रुजोभ र विमल घर्ती मगरले गोल गरे ।
खेलको सुरुवातदेखि नै आक्रमण बनाएको मछिन्द्रले पहिलो हाफमा १ गोलको अग्रता बनाएको थियो । दोस्रो हाफमा भने मछिन्द्रले दुई गोल थप्यो ।
२९ औं मिनेटमा सुनीलले करिम ओमालाको फ्रिकिकमा गोल गर्दै मछिन्द्रलाई अग्रता दिलाएका थिए । सुनीलको लागी भने लिगमा यो तेस्रो गोल हो ।
६७ औं मिनेटमा पहिलो पटक ए डिभिजन लिग खेलिरहेका अजरवैजानी खेलाडी नुर्लानले गोल गर्दै मछिन्द्रको अग्रता दोब्बर पारे । विशाल राईको कर्नरमा पेनाल्टी बक्समा रहेका नुर्लानले गोल गरे ।
वैकल्पिक खेलाडीको रुपमा मैदान प्रवेश गरेका विमल घर्ती मगरले इन्जुरी टाइममा आन्द्रेस नियाको पासमा गोल गरे । जारी लिगमा विमलको यो पहिलो गोल हो ।
चार खेलमा तीन खेल जितेको मछिन्द्र १० अंक जोड्दै शीर्ष स्थानमा उक्लेको छ । मनाङ मर्स्याङ्दी समान अंक भएपनि मछिन्द्र गोलअन्तरमा अघि रहेको हो ।
दोस्रो हारपछि ४ खेलबाट २ अंक मात्र रहेको हिमालयन शेर्पा १२औं स्थानमा झरेको छ ।
यो पनि पड्नुस
ए डिभिजन लिग : एनआरटीको पहिलो जित, सातदोबाटोको पहिलो हार